Будење на креативноста

Креативноста е карактеристика на секој човек, без разлика колку тој ја користи. Доколку се свртиме околу себе, може да забележиме различни архитектури, прекрасни слики, необичните машини, прекрасни музички ремек дела. Сето тоа најнапред било само нечија имагинација!

Сите ние поседуваме креативни механизми. Но, сепак, понекогаш ни се случува „да се заглавиме“ во навиките или пак, почнуваме да гледаме еднолично на работите. Тогаш имаме чувство како нашата креативност целосно да исчезнала.

Најчесто, луѓето кои се наоѓаат во ваква „заглавена“ позиција имаат чувство како да влегле во ќорсокак и како постојано да им се врти еден ист филм во главата, одново и одново. Ги преувеличуваат креациите на другите, а при тоа, кај нив се зголемува чувството на инфериорност.

Па како може да се излезе од оваа „заглавеност“? Како може брзо и едноставно да се влезе во инспиративен и креативен процес? Пробајте го овој начин: Променете го реалистичниот систем!

Што значи тоа?

Тоа значи дека треба да се обидете да погледнете од поинаков агол. Најнапред обидете се да забележите каде и како ја чувствувате оваа „заглавена положба“. Каде на телото или во него го чувствувате тоа? Можеби во стомакот? Или во главата? Или во рацете? Сега променете го реалистичниот систем така што на тоа чувство ќе му дадете боја. Изберете една боја која најдобро го претставува тоа чувство. Едноставно, изберете ја првата боја на која ќе се сетите.

А сега обидете се да му дадете звук на тоа чувство. Каков звук е најблизок до ова чувство?

Одлично, добро сторено! Веќе го направивте главниот чекор. Всушност, сега го користевте оној имагинативен дел од умот со кој можеме да си го претставиме чувството низ различните сетилни системи (визуелни/аудитивни). Понатаму можете дури и да го претставите чувството како мирис или вкус! Каков мирис или вкус има вашето чувство?

Забележувате? Веќе сте во креативен процес! Следно што можете да направите е да ја истражите новата претстава за чувството. На пример, да речеме дека чувството што го имате, изгледаше како црн маглив облак и имаше едноличен звук од далечно радио. Сега можете да си ИГРАТЕ со овие слики и звуци.

На пример, што ќе се случи ако „нацртате“ сребрена линија околу црните облачиња? Или замислете дека го доближувате радиото поблизу. Како тоа ќе се одрази на квалитетот на звукот?

Сигурна сум дека веќе ја сфативте основната суштина до сега, па продолжете сами понатаму. Дозволете им и на оние пооткачените идеи да излезат на површина.

И???

Што се случува сега кога ќе помислите на „заглавената состојба“?

Вашите чувства се променија!!!

Овој процес му овозможува на вашиот ум да има повеќе избори. Наместо да се заглавувате во ќорсокак, вие имате безброј патеки пред вас. А колку повеќе избори има, толку е поголема флексибилноста, и толку е поголема креативноста.

Креативноста е само состојба на умот која може да се покрене со специфични ментални стратегии и може да се зголеми преку истражување на нови перспективи користејќи различни алатки. А најдоброто е тоа што колку повеќе вежбате креативно мислење, толку станувате покреативни!

Едноставно, преку учење како да го користиме умот на различни начини, можеме да го откриеме главниот клуч за откривање на моќта на нашата креативна имагинација.

Автор: Розета Паскали

Tagged